Promokodlar

Bu sənəd "ABC-TELECOM" MMC tərəfindən təqdim olunan bütün promokodların istifadəsi, məhdudiyyətləri, bloklanması, deaktiv edilməsi və mümkün mübahisəli hallar üzrə qaydaları müəyyən edir.
Promokoddan istifadə edən hər bir şəxs bu qaydaları avtomatik olaraq və qeyd-şərtsiz qəbul etmiş sayılır.

1. Promokod nədir?

Promokod – müştəriyə müəyyən endirim, üstünlük və ya kampaniya çərçivəsində təqdim olunan elektron endirim kodudur.

Promokod:

• yalnız bir müştəri üçün nəzərdə tutulur;

• şəxsi xarakter daşıyır;

• başqa şəxslərə ötürülə və ya paylaşıla bilməz;

• üçüncü şəxslər tərəfindən istifadə edilə bilməz.

2. Promokod kimə məxsusdur?

Hər bir promokod:

• konkret ERP müştəri koduna bağlıdır;

• yalnız həmin müştərinin sifarişlərində etibarlıdır.

Əgər promokod başqa şəxs tərəfindən istifadə olunmağa cəhd edilərsə:

• promokod avtomatik bloklanır;

• alış həyata keçirilmir;

• tətbiq edilən endirim ləğv olunur.

Bu halda şirkət müştəri qarşısında heç bir kompensasiya öhdəliyi daşımır.

3. Promokoddan istifadə şərtləri

Hər bir promokod müəyyən şərtlər daxilində etibarlıdır və aşağıdakı parametrlərlə məhdudlaşdırıla bilər:

• İstifadə müddəti – Promokod yalnız müəyyən edilmiş tarix aralığında keçərlidir. Başlama tarixindən əvvəl və ya bitmə tarixindən sonra daxil edildikdə sistem promokodu qəbul etmir və endirim tətbiq olunmur.

• Konkret satış nöqtəsi (mağaza) – Bəzi promokodlar yalnız müəyyən mağazalarda və ya yalnız onlayn alışlar üçün keçərlidir.

• Məhsul və ya məhsul qrupu – Promokod yalnız seçilmiş məhsullara və ya məhsul qruplarına tətbiq oluna bilər.

• Məhsul kateqoriyası – Bəzi promokodlar yalnız konkret kateqoriyalar üçün keçərlidir (məsələn, yalnız telefonlar, yalnız aksesuarlar və s.).

• Minimal alış məbləği – Promokoddan istifadə üçün minimum alış məbləği tələb oluna bilər (məsələn, 300 AZN və yuxarı). Səbətin məbləği bu limitdən aşağı olduqda promokod tətbiq edilmir.

• Ödəniş üsulu – Promokod yalnız müəyyən ödəniş üsulları ilə keçərli ola bilər (məsələn, yalnız kartla və ya yalnız nağd ödəniş). Uyğun olmayan ödəniş üsulu seçildikdə promokod işləməyəcək.

• İstifadə limiti – Promokod bir dəfəlik və ya məhdud sayda istifadə üçün təqdim edilə bilər. İstifadə limiti dolduqda, sistem promokodu avtomatik bloklayır.

• Digər promokodlarla birlikdə istifadə – Bəzi promokodlar digər promokodlarla eyni vaxtda istifadə edilə bilər, bəziləri isə edilə bilməz.
  Əgər birgə istifadəyə icazə yoxdursa, sistem ikinci promokodu avtomatik olaraq ləğv edir.

Qeyd: Bütün bu parametrlər promokod yaradılan zaman sistemdə müəyyən edilir və müştəri tərəfindən dəyişdirilə bilməz.

Əgər sifariş və ya ödəniş yuxarıda göstərilən şərtlərdən hər hansı birinə uyğun deyilsə, promokod avtomatik olaraq tətbiq edilmir və bu hal üzrə şirkət müştəri qarşısında əlavə öhdəlik daşımır.

4. Promokodun bloklanması və deaktiv edilməsi

Şirkət aşağıdakı hallarda promokodu istənilən vaxt deaktiv edə və ya bloklaya bilər:

• promokod texniki səhv nəticəsində yaradılıbsa;

• sistemdə texniki problem yaranıbsa;

• kampaniya dayandırılıbsa və ya şərtləri dəyişdirilibsə;

• promokoddan qanunsuz və ya qaydalara zidd şəkildə istifadə olunubsa;

• promokod üçüncü şəxslərlə paylaşılıbsa və ya paylaşılmağa cəhd edilibsə;

• müvafiq dövlət qurumlarının və ya hüquq-mühafizə orqanlarının tələbi daxil olubsa;

• istifadəçi fırıldaqçılıq riski yaradıbsa.

Bu hallarda şirkət promokodun deaktiv edilməsi və ya bloklanması barədə müştərini əvvəlcədən məlumatlandırmaya bilər.

Promokodun deaktiv olunması və ya istifadə imkanının itirilməsi ilə bağlı olaraq müştəriyə hər hansı maddi və ya qeyri-maddi kompensasiya, güzəşt və ya alternativ endirim təqdim edilmir.

5. Promokodla alınmış məhsulun qaytarılması

Əgər müştəri promokoddan istifadə edərək aldığı məhsulu qaytararsa:

5.1. Qaytarma əsaslı olduqda

Müştəriyə eyni şərtlərlə yeni promokod təqdim edilə bilər.

5.2. Qaytarma əsassız olduqda

İstifadə olunmuş promokod geri qaytarılmır və müştəri yeni promokod tələb edə bilməz.

6. Promokod pul ekvivalenti deyil

Promokod:

• nağd pula çevrilmir;

• balans kimi saxlanılmır;

• kompensasiya edilmir;

• digər şəxslərə ötürülmür.

İstifadə olunmayan promokod üzrə iddia irəli sürülə bilməz.

7. Hansı hallarda promokod tətbiq edilmir

Aşağıdakı hallarda promokod istifadə edilmir və bu əməliyyatlar üzrə müştəri endirim tələb edə bilməz.

7.1. Oğurluq və hüquqi sənədlə qaytarılan məhsullar

Əgər məhsul:

• oğurluq faktı ilə əlaqəlidirsə və ya

• hüquq-mühafizə orqanlarının sənədi əsasında qaytarılıbsa, bu məhsullar üzrə aparılan bütün əməliyyatlar kampaniya və endirim mexanizmlərindən çıxarılır və promokod tətbiq edilmir.

7.2. Zəmanət və kompensasiya əməliyyatları

Zəmanət çərçivəsində aparılan dəyişdirmə, təmir, pul qaytarılması və digər kompensasiya əməliyyatları alış hesab edilmir. Bu səbəbdən həmin hallarda promokoddan istifadə hüquqi və texniki olaraq mümkün deyil.

7.3. Hədiyyə kartları

Hədiyyə kartları pul ekvivalenti sayılır və ayrıca ödəniş vasitəsidir. Promokodun növündən asılı olaraq hədiyyə kartı ilə birlikdə tətbiq olunmaya bilər.

7.4. 120% endirim kampaniyaları

120% endirim kampaniyaları xüsusi kompensasiya mexanizmi ilə işləyir. Bu tip kampaniyalara əlavə promokod tətbiq edilmir.

7.5. Tərəfdaş və daxili kampaniyalar

Şirkət əməkdaşları üçün nəzərdə tutulmuş kampaniyalar, daxili loyallıq və bonus mexanizmləri üzrə promokodlar tətbiq edilmir.

8. Sistem tərəfindən promokodun rədd edilməsi səbəbləri

Müştəri promokodu kassada və ya onlayn sifariş zamanı daxil etdikdə, sistem (Mikro ERP) onu real vaxt rejimində avtomatik yoxlayır.
Aşağıdakı hallarda promokod sistem tərəfindən qəbul edilmir:

• Promokod hazırda aktiv deyil və istifadə üçün açıq deyil.

• Daxil edilən promokod mövcud deyil və ya səhv daxil edilib. Bu halda kod etibarsız hesab olunur.

• Promokod artıq istifadə olunub. Birdəfəlik promokodlar yenidən istifadə edilə bilməz.

• Promokodun istifadə müddəti hələ başlamayıb.

• Promokodun etibarlılıq müddəti bitib.

• Promokod təhlükəsizlik, sui-istifadə və ya inzibati səbəblərlə şirkət tərəfindən deaktiv edilib.

• Promokod həmin müştəri üçün yaradılmayıb və ya ona göndərilməyib. Başqa şəxsə məxsus promokoddan istifadə etmək mümkün deyil.

• Promokod seçilmiş sifarişin şərtlərinə uyğun deyil (məhsul, mağaza, ödəniş üsulu, məbləğ və s.).

Yuxarıda göstərilən hallardan hər hansı biri olduqda, promokodun tətbiq edilməməsi texniki xəta sayılmır və bu, müştəri üçün əlavə endirim, yeni promokod və ya kompensasiya hüququ yaratmır.

9. Şirkətin yekun hüququ

"ABC-TELECOM" promokodların stimullaşdırıcı kommersiya aləti olduğunu nəzərə alaraq, texniki, təhlükəsizlik, inzibati və kampaniya şərtləri ilə bağlı səbəblərlə promokodları dəyişdirmək, deaktiv etmək, ləğv etmək və ya istifadədən çıxarmaq hüququnu özündə saxlayır. Bu hallar müştərilərin əsas satış qiymətlərinə və müqavilə hüquqlarına təsir etmir.

10. Qaydaların qəbulu

Promokoddan istifadə etməklə müştəri bu qaydaların hamısını oxuduğunu və qəbul etdiyini təsdiqləmiş olur.